إشاعات

حكايات حكايات

كلها أشاعات

ده يقول عن ده

وده يحكى لده

وفى بينهم واحد

قاعد ساكت

الدمع فى عينه

ولا حد يعينه

على كلمة يقولها

دايما لايمينه

لو قال ده حرام

يرموله كلام

ويجرحوا فيه

لو قال يا اخوانا

بزيادة حوارت

وكلام اشاعات

خليكوا اخوات

يتقلبوا عليه

ولا يسمعوا ليه

Roshy

منيش جارية

لانى بحبك

منيش جارية

تبيع فيها

انا مش وهم

أو قصة هتحكيها

ولا وردة

فى يوم تزهق

وترميها

منيش لعبه

تزغلل عينك

وتجرى عشان تفوز بيها

ولما تفرح بيها يومين

ترجع تانى تبيع فيها

منيش صفحه

تكتب فيها اشواقك

ويجى اليوم وتطويها

منيش ذكرى

فى حدوته
مهزومة نهايتها
ولا عمرى هكون فيها

Roshy

الفستان الأبيض

شايل فستانى الأبيض

وعليه طرحة مـن التول

وشاغلى كمان بإيديه

تاج منقوش بالفل

وهنسهر سهره جميله

يملاها الفرح تملى

هتلم معانا العيلة

والكل هيجى يهنى

لما يشوفوا فرحتنا

واللى يكبر ويسمى

وبسرعه هنوصل بيتنا

وكمان عصافيرنا تغنى

وهقوم من النوم فرحانه

علشان الحلم اتحقق

والدنيا مهيش سايعانا

Roshy

محتاجلى ازاى

محتاجلى ازاى ؟؟

لسه بتسأل ؟!

يمكن محتاجه مش أكتر

من إنك تسمع صوت نبضى

وتكونلى سمايا

وتكون ويايا على أرضى

يمكن محتاجه احكيلك

وافضفض وياك واشكيلك

من النسمه الحايرة اما تعدى

من عندك ليا وماتهدى

يمكن محتاجه اسمع صوتك

واسمع همساتك وسكوتك

واحس بإيدك تحضنى

والقاك بعيونك تأمرنى

وانفذ أمرك بأشارة

من غير لا سؤال ولّا أماره

يمكن محتاجه تدفينى

وبحبك ليا تكفينى

وعن كل الناس تغنينى

ومن عذب حنانك تروينى

Roshy

ألف وش

ليه تكون بألف وش

عايش حياتك علشان تغش

ليه تكون انسان ورق

وتبان فى وش الناس ملاك

وانت أصلا من جوه هش

ليه تعيش تجرح وبس

تطلب مـ الناس بيك تحس

ولما تتملك وتقدر

تبيع قلوب وتخون وتغدر

أخدت ايه من كل ده

غير كره من ده وده

أهديك نصيحه بس تسمع

ولو كلامى كان بيوجع

اوعاك فى يوم للخلق تخدع

تضر نفسك

توب بسرعه وللمولى ارجع

واطلب سماحه

لجل يغفر وتنول فلاحه

Roshy

سِنَّة تيته

تيته حبيبتى

ليه زعلانه علشان سِنَّة

هتلاقى غيرها

فوق فـ الجنه

فاكرة ياغاليه ؟؟

يوم ما أنا جيتلك ببكى وبشكى

علشان سِنَّة وقعت منى

فاكرة الغنوة بصوتك ليا ؟؟

ولمسه إيدك والحنية ؟؟

قولتِ أَخدها ربنا منك

علشان يبعت أجمل منها

فاكرة ياتيته ضمة حضنك

لما رسمتى صورتى فى قلبك

فاكرة كمان الضحكة الحلوة

لما سمعتى منى الغنوة

طايره حروفها

قولتِ دى نعمة

بس ياتيته ليه ياحبيتى

لما السِنَّة وقعت منك

انتِ زعلتى ؟؟

Roshy

كلمة بحبك

كلمة بحبك لما قولتها

سرقتنى من الدنيا وقتها

معرفش امتى وازاى وليه

مابقاش فى حد أخاف عليه

غير قلبى وانت

معرفتش ارد واقولك ايه

قولت لعيونى تقول مكانى

كل اللى نفسى اقوله ليك

لكن عيونى ضعفت اوام

لما شافت نظرة عينك

نسيت معاها كل الكلام

حتى السلام

والحل ايه

خلى الرسول بينى وبينك

قلبك انت

وصية منك يحس بيا

وكمان وصية علشان عيونك

خليها تبقى بشويش عليا

Roshy

كلمة حق

لو هتكلم

هيكون صوتى هو الحق

ويا شعارى

لازم يوم هنقول لأ

لأ للظلم

كلمة هتدوى وتكون قوة

سيفى العدل بره وجوه

ايدى فى ايد كل اخواتى

اكون وياهم لحد مماتى

نمسك حبل الله بإيدينا

هيقوينا

تملى الشمس النور فى عنينا

ويبقى الخير تملى ملينا

Roshy

ارسم يابنى

ارسم يابنى

هات كراس الرسم ولون

يلا نغير بيه الكون

ترسم ورده و شمس فـ صورة

ونزينها بكام ضحكاية

فى عيون بنوته أمورة

هات الأزرق لون البحر

لون السما معكوس ع النهر

لما سحابة الخير بتعدى

ترمى المطره فـ قلب الزهر

هات الأحمر ويا الاصفر

يرسموا شمس كمان بتنور

لما بتوعد يبقى هتوفى

تلقى الخير هيزيد ويكفى

هاتلى الاخضر لون الزرع

قلبى يكونلك هو النبع

يروى خضار الخير جواك

يمحى الدمعة اللى مشاركاك

كل حياتك ليل ونهار

وهنرميها فى وسط النار

ونبدلها بصوت الضحكه

هتعدينا مـ الأسوار

هاتلى الاسود لون الليل

ويا البنى لون الخيل

زود نقطه كمان م الأبيض

نرسم بدر شكله جميل

والنجمايه عليه بتميل

وانا وياها اسرح وافرح

شجر الفرح اوام راح يطرح

Roshy

أنا وبابا

بابا مسكنى وقالى فى يوم
اوعى يابنتى تنسى الصوم
اصل الصوم يحميكى تملى
احمدى ربك ودايما صلى
انه حباكى نعمة جميله
الاسلام
كل حياتك فيها فضيله
باعد عنك كل رزيله
لبسك دايما يبقى الساتر
يعمى عيون اجدع راجل
ربك شاهد انك بنتى
وانى وراكى بعقلى وقلبى
عمرى ما اسيبك لحظة تضلى
تفضلى دايما ماشية فى ظلى
افخر بيكى يا فلذة كبدى
وادخل بيكى لجنه ربى
سامعه يابابا
كل كلامك حلقه فى ودنى
اصلك دايما فى الحق واخدنى
جوه عيونك تملى شايلنى
بدعى الله يحميك ليا
وافضل اوفى الحق عليا
أصل رضاك عنى يا والدى
كل حياتى وأغلى ما عندى

Roshy

صوت الحق

مين بس يسمع للندا

مين قادر يكون فدا

مين اللى فايق

مين اللى صاحي

مين اللى شايف عرضنا

بيتنهب

مسلوبه مننا حتى الاراده

والانتفاضه

كل يوم بتموت مننا

اكمننا

ع الظلم واقفين نشوف وبس

واللسان ساكت

ولا حد نسمعله حس

واللى يجى يقولنا

ده حقنا

نسكت ويزيد صمتنا

طب فين حق ربنا

ياناس حرام ننهب فى بعض

نبيع الارض

نسيب العرض

ضايع ما بين دا ودا

اسمعوا صوت الندا

كونوا الفدا

اظهروا مره الشهامه

افدوا الكرامه

ياريت نفوق قبل الاوان

قبل ما نكون آخر الزمان

Roshy

محمد & منى

فرحنا الليله الليله ..

واللمة حلوة جميلة ..

هنقول يا حليله ياحليله ..

ده عريسنا ابن اصول ..

ماشاء الله عرض وطول ..

دايما يصبر وينول ..

كايد حساده والله ..

غنوله وصقفوا يلا ..

يا حماده حارسك الله ..

يحميك م العين ان شالله ..

يا أمير وأخدت أميره ..

بنوته رقيقة جميلة ..

من عيلة وبنت أصيلة ..

عسوله تشوفها تملى ..

ضحكتها تعلى تجلى ..

سبحان من خلق اسم الله ..

مرسومه فى لوحه جميلة ..

ماهى قمرنا الليله ..

ماشاء الله كمان ع العيله ..

بابا سكر شربات ..

مقامة مش كلمات ..

وماما كمان يابنات ..

تاخد تاج الستات ..

وحماها سموه وارقوه ..

وقت الشدة تلاقوه ..

مجدع واياكوا تخنوه ..

وحماتها دى حتة سكر .

.شربات ياخواتى مكرر ..

ماشاء الله والله اكبر ..

ربى يكمل فرحتنا ..

تخلص على خير سهرتنا ..

وعيالهم يشغلوا بيتنا ..

تحلى بيهم لمتنا ..

Roshy

ديك البرابرة

شوفوا الواد ماشاء الله عليه

من يومه راجل

هادى وعاقل

يوم ما جابوه على ست بنات

فكروا فكرة

ازاى يبقى الكل اخوات

وازاى يحمى الست بنات

اسمع يابنى نصايح والدك

ما انا مش قدك

عدى على العمر وفات

اياك تطمع

اياك تسمع مره شطانك

يقولك انك ديك البرابره

يادى الغبره

ده هيغويك

بين احضانه هيخليك

اوعى تقول انا بينهم راجل

فعلا راجل

بس الراجل مش بلسانه

ده بأفعاله

لما يقول الصح تملى

لما يفكر بيكون عاقل

بين اخواته بيكون فاهم

يحمى البيت من جوه وبره

ويصون اخته ماهى الدّره

يخاف على عرضه

ويصون ارضه

عمره فى يوم ما يكون غلبان

ولا حتى شيطان

يكون انسان مش يتهان

يعرف انه يدين ويدان

يتعلم من غلطة غيره

ولو يستمتع هو بخيره

يكون بحساب

عيش واتهنى

بس ياولدى راعى ضميرك

حتى فى خيرك

بص لغيرك

علشان تفضل تحمد ربك

علشان كرمك

خلاك راجل ملو هدومك

وكمان عندك م الاخوات

ست بنات

آدى كلامى فى حلقه فى دنك

اوعى شطانك مره يذلك

Roshy

عرضنا

اه يابابا على جرا

امة الاسلام ورا

واللى يتكلم يموت

واللى يعلاله صوت

ده ارهابى

والقطر لازم عليه يفوت

واللى تلبس يوم حجابها

تندبح ويهون شبابها

طب وليه

ليه تضيع الانسانيه

فين ضمير البشرية

فين الكلمة القوية

فين الفاروق

امتى نفوق

فين عمرماهو مش قدر

نعيش فى ذل طول عمرنا

ونقول ده امر ربنا

ابدا ياعالم

ربنا على الظلم قادر

بس انت بلاش تهون

نفسك عليك

خليك سوى

صوتك قوى

واياك تقول مش همنا

مش ارضنا

مش عرضنا

ماهى انسان زينا

حتى احسن مننا

ماتت فى سبيل ربنا

Roshy

أسماء

مش عارفه اوصف قد ايه بحبها

ماهى منى وانا منها

آه لو تشوفوا ضحكها

ولا عيونها وسحرها

بنوته حلوه

شقاوتها غنوة

ساعات تشوفها يادوب تحبى

من ألف ليله تختار وتحكى

وساعات تعدى العشرين بيوم

آخر جنان من غير هموم

مهما قولت عمرى ماهوفى

الوصف فيها مش هو هدفى

أصل الكلام عنها ما يكفى

عسوله أختى وغلباوية

هدية ربى أهداها ليا

ياسومه لازم أقول بحبك

وهدية منى بوسه لخدك

Roshy

العرافة

أبين زين وأقرا الودع
هقولك ياحلوة البدع
أرمى بياضك ياشابة
ياللى حلمك واد جدع

ياللى بتقرى الودع
أقرى كفوفى وسمعينى
قولى ايه ليا اترسم
بس اوعى تخوفينى

الله ياشابة على دا الكف
فيه الحبايب عدو الالف
فيهم حبيب على باب دارك
لا هو صاحبك ولا كان جارك
مستنى منك بس الاشارة
او حتى رمشك يؤمى الامارة

قولى ياستى تانى وزيدى
حلو كلامك يلا عيدى
من حبيبى وفين نصيبى
اللى حبه يقيد لهيبى
أحكى أكتر عن حياتى
قولى ايه أكتر صفاته

أمير زمانه وأنتى أميرته
شايلك فى عينه شاغلك بغيرته
كلامه سيف والغالى قيمته
الصح قوله ورجولته هيبته

حلو كلامك طمنلى قلبى
لكنه كله بإذن ربى
قادر يخلى الكلام ده حظى

Roshy

شايفنى زيهم

ليه شايفنى زيهم

ليه حاسسنى منهم

لا انا ولا انت قادرين نعيش وسطهم

صدقنى افرق عنهم

مش شوية لا كتير

بطلب تشوف منى الحقيقة

شوفنى بعنيك البريئة

فكر بقلبك ويا عقلك

اوعى غضبك يوم يضلك

اوعاك فى يوم تنسى اللى حبك

واللى ساكن جوه قلبك

اللى عشت ما بين ضلوعه

واللى عاش جزء منك

ايوا طبعا مش زيهم

Roshy

بهية

بهية

مهما طال انتظارها

مهما غاب عنها ياسين

شايله بين ايدها امالها

وفى قلبها مليان حنين

ايوا راجع

مهما كان الخوف فى قلبه

قد منه مرتين مليان حنين

وشوق لبلده

يببقى ليه يهرب ويبعد

طب وليه يعيش غريب

خدها منى كلمة واحده

ارجع ياسين خليك فى ارضك

ايوا بلدك اولى بيك

حتى لو كانت نهايتك هى الجنون

مهما امك تقسى برضه هى امك

هتلاقيها اوام تحن

مستحيل ايدا تهون

ارجع ياسين

Roshy

أصعب لحظة

أصعب لحظة

لما تلاقى أغلى ماليك

يبكى لوحده

وانت معاه

تسأل مالك

تلقى الصمت يرد سؤالك

تقوله احكيلى

حتى اشكيلى

يمكن أقدر أغير حالك

يعلى بُكاه

يدوى صداه

يفضل يبكى وتبكى معاه

تاخده فى حضنك

صدره يضمك

نفسك تسأل تانى سؤالك

وتقول مالك

تلقى لسانك بقى متلجم

زى الطفل مش متعلم

منتاش دارى

هتقول إيه

أصل كلامك مش هيفيد

طول ماهو ساكت

مش هيقلل ولا هيزيد

تفضل تدعى

ربى معاك

لو محتاجلى

هكون وياك

بس أتكلم

فضفض ليا

أصل دموعك غليا عليا

أوعاك تبكى يا أغلى ملاك

ياللى حياتى وروحى فداك

Roshy

والله زمان

الليلادى جه وقالى

كل كلمة حلمت بيها

جاب معاه حكايات زمان

فكرنى بيها

بيتنا اللى كان

قدامه بيت

بيته هو

بيت الجيران

رجعنى تانى لحلم مات من سنين

كنت فاكرة نسيه اوام

كنت خايفه اكون لوحدى اللى فاكرة

لقيت قلبه لسه فاكر كل ذكرى

كل كلمه وكل فكره

حتى الورق اللى طاير

واللى كان ما بينا حاير

والورود والشموع

والسعادة بدون دموع

والهنا اللى كان ملينا

والحنين ما بين عنينا

ياريته جالى من زمان

المهم انه جالى

جاى فى وقته

لسه مش فات الاوان

قولتهاله وقالها ليا

حبى ليك زاد عن ما كان

Roshy

راجعه أكيد

مش حاسه ليه بالدنيا ديا
وقلبى تاه من بين ايديا
محتارة بينى وبينى نفسى
مش عارفه ليه مابقتش هى
البنوته اللى عرفتها
كانت لذيذة وكمان شقية
مش عارفه ليه ضيعتها
انا رافضه اعيش بالشكل دا
مش هكون الا انا
مش زمان اللى هيرجع
مش ناوية اعيدة
مش هقول مفيش أمل
هعيش حياتى اللى جاية
واعمل لنفسى دنيا تانيه
وهبتديها بالعمل
والحياة تضحك بقى
والدنيا تبقالى سعيدة
وارسم لوحتى الجديدة
فيها شمس وفى سما
والوان الكون العنيدة
اصرارها عالى
يعلى النجوم
وابدأ معاها يوم بيوم
ومسيرى هوصل وابقى انا
كلى منا
ايوه دى هى أنا



Roshy

ماكنش حب

ياقلبى خليك قوى

وانسى اللى باعاك

واشترى قلب اشتراك

عايش عشانك

ياقلبى خليك قدها

كلمه وقولتها

ولو سمعت عنه كلمه

قول مش فاكره وقتها

قول نسيت

قول قسيت

وليه بتندم علشان نسته

مصدقاك وعارفه انك حبيته

بس باعك

وكان فى باله يوم وداعك

خليك بقى قلب تانى

غير اللى كان

بتاع زمان

دايما مسامح

فى الحب سارح

واللى تحبه بيبقى جارح

خليك قوى

وانسى اللى باعاك

واشترى قلب اشتراك

Roshy

ليه ياقلبى

ليه ياقلبى الاسير
ليه تسيب الظلم ليه
يبقى ليك زى المصير
ليه تسيبه يحكمك
ليه تسيبه يلجمك
كنت حابه زمان اشوفك
حر نفسك ناسى خوفك
عمر يوم الظلم ابدا
ماكان طبعاك
جاى تندم ؟؟
قولى ليه
قولى بس عملت ايه
تتظلم وظلمت ليه ؟؟
ليه ياقلبى الأسير
ليه وليه تعيش ذليل
قول بس ايه الدليل
ان الخير جواك يهون
والشرور تملى العيون
قولى ياقلبى الأسير

Roshy

كرهت قلبى

حبك علمنى الجفا

علمنى انسى الوفا

وقت حبك كنت طايرة

بين جنه وبين نار كنت حايره

لما قولت ابعد

يمكن الراحه بعيد

شوقى ليكى بيرجع

والجروح معاه تزيد

بس بعد ماهونت يوم

مستحيل تلاقنى راجعه

حتى لو زادت هموم

كل ده اكيد يهون

فى سبيل النور لنفسى

لما ازيل كل الغيوم

من عيونى مره

من قلبى ألف مره

وكل مره هحس جرحى

هنسج بيه خيوط لفرحى

وان كنت حاسس انى ظلمتك

كل ده من ظلم قلبك

خلى قلبى يبقى قاسى

كنت بغفر يوم واسامح

رغم كل المقاسى

بس دلوقتى خلاص

ضاعت معانى الاخلاص

بس صدقنى هتخسر

لما تبقى مش مقدر

حبى ليك وشوقى ليك
وكل حاجه بإختيارنا
ياه خلاص ضاعت أملنا

Roshy

كلمة صدق

كنت نفسى اقولها ليه من زمان
لما كان الحب بينا وكان وكان
كنت عاوزة اقولها مره
كنت بقولها جوا نفسى
بس كنت ببقى حره
ايوه قولت المره ديا
بعلو صوتى وقالها ليا
كنت حاسه بشئ رابطنى
مش مهم علشان سامعنى
كله علشانه يهون
هبقى حره اكيد فى يوم
طول ماهو جوه قلبى
طول ماحاسه بصدق قلبه
حتى عينه لو قالتى
حاجه تانيه مش هصدق
غير كلامه ونبض قليه
قالوا حسادنا دى كلمة
قولته لأ ده شوق أملنا
كان مجرد حلم فـ خيالنا
بس بالحب اترسم
والخيال اصبح حقيقة
عيشنا من اول دقيقه
نرسم لبعض فى طريقنا

Roshy

إعتراف

عارف

انت زيى وانا برضوا كنت زيك

عيشت ابكى ويا ظلمة ليل طويل

ولا حد حاسس بيا ايه

ولاحد سأل الدمع ده سببه ايه

كنت وحدى فى غربة طالت

كنت عارفه انى زيك

كنت حاسه بجرح قلبك

نفسى برضوا تكون حاسسنى

كنت بصرخ بعلو صوتى

نفسى اقولك انى حاسه

وانى سامعه صوت صراخك

بس صوتى كان معاند

رافض يطاوع نبض قلبى

لما دمع عينى سال

شوفت مركبك لما مال

شوفت شراعه الهادى لما تاه

بين موجين والبحر هاج

شوفت المك شوفت جرحك

كنت عارفه انى يوم كنت فرحك

وانت برضه كنت فرحى

ليه زمانا فرق ما بينا

ليه بعدنا وفى طريقنا توهت منك

ماتفتكرش انى نسيتك

عارفه برضه انك فاكرنى

عارفه انك جوه قلبك لساك شايلنى

قلبى برضه لسه شايلك

لسه حاسك نفسه يرجع تانى جنبك

لسه حاسس انه ضامك

ايوه لسه

عمرى ما انسى

انك انت اصل كل حاجه حلوة

عشت فيها

حتى طيرنا لما غنى

لما شوفنا الدنيا جنه

لما شوفنا طريق أملنا

ايوه لسه

Roshy

لأجل عنيك

لست انا من سلب النوم من جفونك
بل انت من سلبنى النوم
سلبنى لبى واجتاح كل فكرى
غزوتنى لكن ليس كغزو العدو لأرض غيره
بل كصاحب حق استرد حقه
تسألنى المأوى ومأواى الوحيد قلبك
أسألك بكل كلمة سطرتها من أجلى
أسألك بحلم الفراشات بين الينابيع
بكل حبة رمل أثارت غيرتك
بوضع اسمى منثور فوقها
الا تدعنى افيق من ذلك الحلم الجميل
دعنى اتنفس رحيق الشوق بين عينيك
يامن تركت الكون من أجلى
قد تركت الكون من أجلك
نسجنا سويا كونا خاص يضمنا
لست انا من سلب النوم من جفونك
بل انت من سلبنى النوم
سلبنى لبى واجتاح كل فكرى
غزوتنى لكن ليس كغزو العدو لأرض غيره
بل كصاحب حق استرد حقه
تسألنى المأوى ومأواى الوحيد قلبك
أسألك بكل كلمة سطرتها من أجلى
أسألك بحلم الفراشات بين الينابيع
بكل حبة رمل أثارت غيرتك
بوضع اسمى منثور فوقها
الا تدعنى افيق من ذلك الحلم الجميل
دعنى اتنفس رحيق الشوق بين عينيك
يامن تركت الكون من أجلى
قد تركت الكون من أجلك
نسجنا سويا كونا خاص يضمنا
لن ارى سواك ولن ترى سواى

Roshy

بين دقة ودقة

بحبك يا ملاكى
قولتهالك ألف مرة
وكل مرة أقولها ليك ِ
ببقى سامع ألف دقة
وأبقى شايف بين عنيكِ
كلام جميل فى زوق ورقة

كل مرة تقولها ليا
ابقى حساك بين إيديا
أبقى نفسى أكون فى حضنك
وأسكنك جوه فى عنيا

من غير كلام أنا قلبى حاسك
بفهمك من بس همسك
ابقى عارف عاوزة ايه
عاوزانى اكون تملى جنبك

ايوة عاوزة تكون معايا
تكونلى نجمايا فى سمايا
تملى تنورلى ليلى
والفجر يطلع تكون معايا

Roshy