زي النهاردة بالظبط عرفت ان معاد جوازي هيتقدم من شهر ٢ لشهر ١٢
يوم٢٣/١٠/٢٠١٠ ماما جت وقالتلي ان عمي مسافر والفرح هيتقدم علشان يحضره قبل ما يمشي
ويتقدم الفرح والسفر يتلغي .. وتبدأ خواطري
فاكر
زي النهارده ومن سنه
كان كلامنا عن حبنا
عن حلمنا
عن نسيج هيجمع شملنا
ويضمنا
انت وانا
بيت صغير مليان هنا
فاكر قلقنا؟!
فاكر لما قولتلك
فرحنا قرب عن معاده
لظروف سفر
رغم السعاده والفرح
بدأت معانا بلخبطه
الشقه لسالها شويه
مهياش متظبطه
بس انت بسرعه وعدتني
هنجز اوام
طمنتني
كنت عارف لما أفكر
ساعتها مش هنام
قولتلي دي حاجه تبسط
مش تزعل
حلمنا كملت خيوطه
واترسم قبل الاوان
والصعب هان
وادي القدر
نعمل فرحنا قبل المعاد
وبعدها مفيش سفر
